နှစ်လွန်ပင်စင်ဖြစ်ရင် ဘယ်လိုဆောင်ရွက်ရမလဲ?
နှစ်လွန်ပင်စင်ဆိုတာ ဘာလဲ?
မိဘပြည်သူပင်စင်စားတို့အနေဖြင့် မိမိတို့ပင်စင်လစာတွေကို အကြောင်းအမျိုးမျိုးကြောင့် လစဉ်မထုတ်နိုင်ဘဲ ပင်စင်မထုတ်ဖြစ်တာ (၁၂) လကျော်သွားခဲ့ရင် “နှစ်လွန်ပင်စင်” စာရင်းဝင်သွားမှာ ဖြစ်ပါတယ်။ အဲဒီလိုမျိုး အခြေအနေနဲ့ ကြုံလာခဲ့ရင် မိမိပင်စင်လစာကို ပြန်လည်ထုတ်ယူဖို့အတွက် နှစ်လွန်ပင်စင် လျှောက်ထားပေးရပါမယ်။
ဘယ်မှာလျှောက်ရမှာလဲ?
မိမိထုတ်ယူနေတဲ့ သက်ဆိုင်ရာမြန်မာ့စီးပွားရေးဘဏ်ကနေပဲ နှစ်လွန်ပင်စင်လျှောက်ထားရမှာပါ။
ဘာတွေလိုအပ်သလဲ?
ပင်စင်စားတို့အနေဖြင့် နှစ်လွန်ပင်စင်လျှောက်ထားဖို့ လိုအပ်တဲ့ အချက်အလက်လေးတွေကတော့ ဖော်ပြပါအတိုင်းပဲဖြစ်ပါတယ်။
(၁) နှစ်လွန်ရသည့် အကြောင်းအရင်းကို ဖော်ပြထားသည့် ကိုယ်တိုင်းရေးလျှောက်လွှာ။
(၂) နှစ်လွန်နေစဉ်အတွင်း ရပ်ကွက်အတွင်း နေထိုင်ကြောင်း ရပ်/ကျေးဥက္ကဋ္ဌထောက်ခံချက်။
(၃) နှစ်လွန်နေစဉ် ပြစ်မှုကင်းရှင်းကြောင်း ရဲစခန်းထောက်ခံချက်။
(၄) အငြိမ်းစားလက်ခံစာအုပ်။
ဒါကတော့ ပင်စင်စားဘက်က ပြင်ဆင်ထားရမည့် စာရွက်စာတမ်းတွေပါ။ ဒါတွေပြည့်စုံရန် သက်ဆိုင်ရာဘဏ်ကို သွားရောက်လျှောက်ထားနိုင်ပါတယ်။
ဘာတွေဆက်ဖြစ်မှာလဲ?
မြန်မာ့စီးပွားရေးဘဏ်ခွဲကနေ ပင်စင်လစာ မည်သည့်နေ့အထိ ထုတ်ပေးခဲ့ကြောင်း ထောက်ခံချက်နှင့်အတူ ပင်စင်ဦးစီးဌာနကို ပေးပို့ပါလိမ့်မယ်။ ပင်စင်ဦးစီးဌာနကို လျှောက်လွှာရောက်လာရင် ပင်စင်စားရဲ့ မိခင်ဌာနဆီကို ခွင့်ပြုမိန့်တောင်းခံပါမယ်။ ခွင့်ပြုမိန့်ရရှိလာရင်တော့ ပင်စင်ဦးစီးဌာနကနေ နှစ်လွန်ပင်စင် ခွင့်ပြုကြောင်းကို ပင်စင်စားနှင့် ဘဏ်ကို ပြန်လည်အကြောင်းကြားပေးပါတယ်။ အကြောင်းကြားစာ လက်ခံရရှိတာနဲ့ ဘဏ်ကိုသွားရောက်ပြီး နှစ်လွန်ပင်စင်ထုတ်ယူနိုင်ပါပြီခင်ဗျ
ပင်စင်ဦးစီးဌာန
(၇-၄-၂၀၂၂)
👍
ReplyDelete